Upernaaq 2021-mi Namminersorlutik Oqartussat suliffeqarfiutaanni siulersuit arlallit nutarterneqarput. Tamannalu nunatta takornariaqarnermik siunnersuisoqarfiani, Visit Greenland A/S-imi aamma atuuppoq, tassami siulersuisuni siulittaasooreersoq kisiartaalluni qiningaaqqimmat, sinnerilu tamarmik siulersuisuni ilaasortanngortut nutaatut issiatitaalerlutik.

Tamatumani ersarippoq Naalakkersuisut nukinnik nutaanik, nunatsinni inuussutissarsiuteqarnermik kiisalu takornariaqarnermik siuarsaanissamik sulialinnik, siulersuisuni issiatitaqarnissartik pingaartissimagaat.

Siulersuisuniilersut ilaanni qiningaasimavortaaq Gerth P. Olsen, Destination Diskobayimi kiisalu Qeqertalik Business Council A/S-imi pisortaq.

”Tamanna immikkoortortaqarfitsinnut iluaqutaassaqaaq, tassami Qeqertarsuup tunuani perorlungalu takornariaqarnermik misilittagaqarluartuusunga, tulluusimaarutigeqisannik Visit Greenlandip siulersuisuani sumiiffipput sinniisuuffigisussanngorpara” Gerthi oqarpoq.

Taassumalu nassuerutigaa immikkoortortaqarfitta ornigassatut piareersarneqarnissaanut annertuumik suliassaqartoq, kisiannili Ilulissani mittarfissuartaarnissaata tungaanut piareersarluarnissaq qitiutinneqartoq, tassami tamanna Qeqertarsuup tunuanut Kommune Qeqertalimmuttaaq malitsigisaanik sunniuteqarluarumaarmat. Tassungalu atatillugu, tikeraanut tikilluaqqusinissaq anguniarlugu, Avaannaata Kommuniani inuussutissarsiuteqarnermik takornariaqartitsinermillu suliaqartut qanimut suleqatigilluarnerulernissai qilanaarutigai.